1979 senesi doğma Aqyar sakini «VKontakte» Rusiye içtimaiy ağında, Rusiye uquq qoruyıcılarınıñ fikirince, millet mensüpligine köre şahıslar gruppasına qarşı «nefret ve duşmanlıq doğurğan» izaatları içün 10 biñ ruble para cezasını aldı. Bu aqta avgustnıñ 8-nde Rusiye kontrolindeki şeer prokuraturası haber etti.
«Bu yıl iyul ayında «VKontakte» içtimaiy ağında adise-vaqia ve qazalar gruppasında millet mensüpligine köre ve yaşağan yerine köre birleştirilgen şahıslarğa nisbeten nefret ve duşmanlıq doğurğan izaat yerleştirildi. Bu izaatnıñ müellifi 1979 senesi doğma yerli sakin oldı», – dep aytıla haberde.
Erkek ne aqta yazdı aytılmay. Adı ve soyadı aydınlatılmay, onıñ açıq izaatları ise yoq.
Ukrayina prezidentiniñ Qırım Muhtar Cumhuriyetindeki temsilciligi Roskomnadzor Qırım da olğan Ukrayinanıñ Rusiye tarafından işğal etilgen topraqlarındda kontrolni quvetleştire, dep haber etti.
Berilgen malümatqa köre, Rusiye müessisesiniñ emrinen internet provayderleri internet ağına bağlanğan bütün cihazlarnıñ IP adreslerini, geolokatsion malümatını, ağğa irişmek içün qullanılğan bütün cihazlarnıñ identifikatorları, qullanılğan programmalar ve internet trafiki aqqında malümatnı toplap Roskomnadzorğa bermeli.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını «areketsizleştirgenleri» içün yaqalana ve memuriy ve cinaiy mesüliyetke çekile.
