«Memorial» aq qorçalayıcı merkezi Keriç köprüni patlatuv davasınıñ sekiz qabaatlanğan kişini siyasiy mabüs dep tanıdı. Olarnıñ davası Rostovda Cenübiy okrugınıñ mahkemesi tarafından baqıla. Qabaatlar arasında – terror ücümi, patlayıcı cihazlarnı qanunsız saqlav ve qaçaqçılığı.
Mabüsler arasında uquqçı Artem Azatyan, Georgiy Azatyan, Oleg Antipov, Aleksandr Bılin, Ukrayina vatandaşı Vladimir Zlob, Moldova ve Ukrayina vatandaşı Roman Solomko, Ermenistan vatandaşlığı olğan aydavcı Artur Terçanân ve diger mabüslernen Dmitriy Tâjölıy bar.
Rusiye tahqiqatınıñ versiyasına köre, er biri bir-birine yük berdi, anbarda onı saqladı, ozğardı ya da başqa yerge taşıdı. Neticede yük maşinasında polietilende saqlanğan patlayıcı 2022 senesi oktâbrniñ 8-nde Keriç köpründe patladı. Dava mabüslerinden iç biri qabaatını tanımay.
Tahqiqat qabaatlanğanlarnıñ yükte patlayıcı olğanından haberi olğanına dair delil beremedi, dep qayd ete «Memorial». Rusiye tahqiqatı terakt teşkilâtçısı olaraq sayğan Ukrayina istihbaratınıñ yolbaşçısı Vasıl Malük zıncır iştirakçileri «gizli» qullanıldı, patlavdan soñ FSBge kelip, tahqiqat ile işbirligi yapqanı tutulğanlarnıñ areketlerinde bir maqsat olğanını köstermey.
«Rusiye akimiyeti kerçek teşkilâtçı ve icracılarnı tapamağanı içün tahqiqat irişe bilgen insanlarnı mahkemege oğratmağa istedi», – dedi aq qorçalayıcılar.
2022 senesi oktâbrniñ 8-nde işğal etilgen Qırımnı Rusiyeniñ Krasnodar ülkesinen bağlağan Keriç köpründe yük maşinası patladı. Neticede yedi yaqarlıq tsisternası yandı, 17 tsisterna zarar kördi. Yük maşinasınıñ aydavcısı ve daa dört insan elâk oldı. Köpürniñ bir qısmı tüşti, 2023 senesi mayıs ayına qadar areket tolusınen ğayrıdan tiklendi.
Ukrayina akimiyeti köpürni bir arbiy nişan olaraq körgenini çoq bildirgen edi, çünki işğal etilgen Qırımğa em askerler, em Rusiye ordusınıñ arbiy tehnikası andan ketirile. Ukrayina telükesizlik hızmeti patlav ile alâqalarını tek 2023 senesi iyul ayında tanıdı.
